Qaybtii 4aad
Sheekada Dhiirigalinta leh ee Larry Swilling
Waligaa Ma u malaysay in hadafyadaadu ay yihiin qaar aade u adag oon la gaadhi karin?
Waliga ma istidhi inaad aad uga waynaatay waqtigii aad hadafyadaada gaadhi lahayd?
Waligaa ma isku dayday inaad gaadho hadafyadaada hadana ma quusatay oo
ma rajo dhigtay ka hor intaadan gaadhin?
Haddii aad HAA kaga jawaabtay mid kamid ah su'aalahaa waxaad u baahan
tahay inaad ogaato sheekada Larry Swiling.
Larry waa nin 77 jir ah, waana nin naxariis badan oo xaaskiisa si aad u jeclaa.
Waxa ay isqabeen xaaskiisa 57 sano waxaanu gaadhay heer aanu qiyaasi karin
sida ay noloshiisu noqon lahayd iyada la'aanteed !
Balse nasiib xumo, xaaskii Larry waxa ku dhacay kalyo xanuun waxaana loo
sheegay in kali ka mid ah kalyaha xaaskiisu ay shaqadii joojisay, ayna tahay in
dhakhtar la dhigo. Larry wuxuu ogaa in haddii xaaskiisa loogu deeqo kali ay
badbaadi karto balse muu garanayn cid uu kali uwaydiiyo oo ugu deeqda xaaskiisa.
Markii uu dayday waxoogaa qof kali u saara xaaskiisa, nasiib umuu yeelan inuu
helo , balse wuxuu sameeyay wax layaab leh, wuxuu qaatay loox uu ku qoray "
kali ayaan ugu baahanahay xaaskayga" waxaanu iskaga dhajiyay xaga hore.
Larry wuxuu bilaabay inuu socod ku maro wadooyinka saacado badan maalin
walba. Sidoo kale Larry wuu shaqayn jiray, waxaanu socdaalkiisa uu ugu
daydayayo kalida xaaskiisa uu bilaabi jiray kadib markuu dhameeyo shaqaadiisa.
Larry wuxuu lugeeyay in ka badan 250 mile. Maalin ayaa wuxuu lugeeyay 15
mayl iyadoo cimiladu aad u xumayd aadna u kulalayd. Sidoo kale Larry waxay
dhibaato ka haysatay oo xanuunayay jilbaha waxaana ku adkayd inuu xataa lugeeyo.
Dadku waxay ugu deeqayeen lacag balse wuxuu ugu jawaabayay " waad ku
mahadsan tihiin, waxaan xaaskayga u rabaa oo kaliya kali si aan u badbaadiyo"
Larry wuxuu lugaynayay sanad dhamaystiran! Ilaa uu noqday 78 jir! HAA sanad
dhan ayuu raadinayay markii ugu dambaysayna wuxuu helay qof ugu deeqa
xaaskiisi kali, waanu badbaadiyay xaaskiisii"
Larry wuxuu ku badbaadiyay xaaskiisii uu jeclaa sababtoo ah wuxuu lahaa rajo
iyo go'aan dhagax ah.
Waayihii adkaa ee uu Larry waajahay !
● Waqti muu haysan sababtoo ah wuxuu gudanayay shaqadiisa maalin laha ah
● Lacag ku filan muu haysan xaaskiisuna waxay u baahnayd 4000 dollar bishiiba si loo daweeyo.
● Da'diisu waxay ahayd 78 jir.
● Wuxuu raadinayay waxay adag tahay in la helo
● Xaaladiisa caafimaad may ahayn mid saa u fiican Bal hadaba adigu isku noqo
Waa maxay cudurdaarkaagu?
Miyay hadafyadaadu dhab ahaan adag yihiin in la gaadho?
Imisa mayl ayaad u lugaysay si aad u gaadho?
Imisa jir baad tahay?
Miyaad u dagaalamaysaa waxaad dhab ahaan urabto nolosha?
Haddii aad ugu dagaalami lahayd oo waxa aad doonayso si la mid ah sidaa uu
Larry ugu dagaalamay inuu xaaskiisa badbaadiyo waxaa hubaal ah inad maalin
gaadhi lahayd hadafkaaga.
Waa wax aad u fudud inuu qofku la yimaado cudur daar uu ku eedayn karo qof
dhibaatooyinka isaga haysta. Inaad naftaada been u sheegtaa waa mid ka mid
ah wadooyinka ugu dhaw ee kugu hogaamiya guuldarada. Haddii aad rabto
sida ay dhab ahaan u dhacdo guushu waa dareenkaaga islamarkaana aad
tixgalisaa sida sheekooyinka dadka guusha gaadhay sida ninkan Larry Swilling.
Ninkan 78 jirka ah ee u lugeeyay 250 mile si uu u badbaadiyo xaaskiisa kuna guulaysatay.
Sheekadii Ganacsade Somali ah Oo ku Taajiray 15 Dollar
Haddii aad u fiirsato dhamaan sheekooyinka ku taxaluqa dadka guusha
gaadhay, magacyada, jinsiyada iyo meesha lagu noolyahayba ha ku kala
duwanaatee waxaa dhab ah inay ka midaysan caqabada iyo duruufaha kala
gadisan ee ay waajahaan intay ku gudo jiraan socdaalkooda guusha iyo sida ay
uga dabaashaan caqabadahaa.
Saleebaan Maxamed Faarax wuxuu sanadkii 1994 ganacsigiisa ku bilaabay
tanag timir ah oo uu dulsaaray miis iyo dalaayad uu ka qotomiyay meel dhinaca
ku haysa jidadka waaweyn ee magaalada Hargeysa mid kood oo ku dhexyaala
goob suuq ah oo noocyo kala duwan oo ganacsi ahi ka socdaan.
Waxay ahayd waqti adag oo gobolada waqooyi ay markii uun ka soo
kabanayeen dagaalo mudo socday oo ay lagu waayay mood iyo noolba barakac
baahsana sababay. Waxay ahayd waqti nolosha dadka ku dhaqan Hargeysi ay
aad u adkayd iyadooy ugu wacnayd deganaansho la'aan dhinaca amaanka ah,
sicir bararka maciishada oo aad u sareeyay iyo dhibaatooyin kale oo badan.
Markii uu iibsaday tanaga timirta ah ee uu ganacsigiisa ku bilaabay wuxuu
siistay 21 dollar oo uu soo amaahday, waxaanu maalintiiba ka faa'idi jiray hal
dollar oo kaliya. Wuxuu ahaa qof aaminsan naftiisa, isla markaana aaminsan
inuu ka dhabayn karo horumarna ka gaadhi karo ganacsigaa yar ee uu bilaabay.
Maxamed markii uu mudo bil iyo badh ah waday ka ganacsiga ee uu faa'ido yar
ka qabtay timirtii uu iibinayay ayaa wuxuu bilaabay inuu ku soo kordhiyay
miiskii laws iyo cananis uu xidh xidhi jiray. Markii uu waxooga faa'ido ka qabtay
intii ayaa wuxuu uga digo rogtay inuu iibiyo dharka bacadlaha isagoo iibin jiray
kabo iyo dhar ay dadka danyarta ah xidhaan isagoo markii dambe ganacisigiisii
u sii balaadhiyay inuu keeno daahyada guryaha lagu xidho, taasina ay u
saamaxayday inuu madaxa la galo nooca ganacsiga uu maanta ku gudo oo ka
kooban qalabka qurxinta guriga iyo qalabaynta xafiisyada.
Maxamed Saleebaan haatan astaantiisa iyo magaca meheradiisa waxaa si weyn
looga yaqaana gayiga somalidu dagto. Isagoo ay alaabtu uga soo dagto
wadamada dibada sida Shiinaha iyo Turkiga, Qaar badan oo alaabtiisa ahna
lagu farsameeyaa wadanka gudihiisa.
Maxamed Saleeban Imika waa Mulkiilaha mid kamid ah shirkadaha ugu sanka
dheer ee ka ganacsada qalabka guryaha iyo xafiisyada waxaana la yidhaa
shirkadiisa AL-XAYAAT FURNITURE AND HOME DECORATION.
Maxamed waa waqtigan xadigiisa maaliyadeed lagu qiyaasaa adduun gaadhaya
dhawr Million oo dollar oo uu ka bilaabay 15 dollar oo uu siistay tanag timir ah,
isagoo aanu qofna caawin.
Casharada aan ka barran karno sheekadan:
● Adoo ka bilaabay meel hoose ayaad gaadhi kartaa meel sare: Maxamed
wuxuu ka bilaabay ganacsigiisa 15 dollar oo siistay tanag timir ah maanta
hantidiisu waxay gaadhaysaa dhawr MILYAN oo dollar. Haddii
aaminsantahay awoodahaaga iyo inaad guul gaadhi karto meel hoosaba
aad ka bilawdide waxaa shaki ku jirin inaad maalin uun gaadhi doonto halkaad rabto.
● Isbad-badal yeelo: Maxamed ganacsigiisa wuxuu ku bilaabay tanag timir
ah balse kumuu joogsan intaas oo kali ah ee wuxuu ku fikiray sidii uu u
balaadhin lahaa ganacsigiisa si uu u gaadho yoolkiisa oo ah inuu noqdo ganacsade weyn.
● Ku fikir inaad samaysato ganacsi: Maxamed wuu awooday inuu shaqo
uu nolol maal-meedkiisa ku dabaro helo balse wuxuu ka doorbiday inuu
samaysto ganacsigiisa walow faa'idaduu ka helayaa haba yaraatee.
Haddii aad ku fikirto uun inaad shaqaale ahaato waxaa dhab inaanad
horumar la taaban karo kaa gaadhi doonin waligaa, sikasta oo aad u
shaqaysana lacagta lagu siinayaa ay ahaan doonto mid kooban. Balse
hadaad ganacsi furato faa'idadaadu waxay noqon doontaa mid xad lahayn.
● Jooji inaad ka cabato caawimaad la'aan: Maxamed intii uu horumarkaa
samaynayay ma jirin qof ka caawiyay isla markaana soo gacan qabtay.
Inaad cudurdaar samaysataa waa wax fudud balse ogow inay dhabar jab ku tahay horumarkaaga iyo ogaato awoodahaaga ayna kuu horseedayso guuldaro.
● Adna Sidoo kale waad samayn kartaa: Wuxuu Maxamed ka soo bilaabay
meel aad u hooseysa, manuu haysan wax ka badan inta laga yaabo
intaad maanta haysato, xaqiiq ahaan waxa laga yaabaa in waxa aad
maanta haysataa ay ka badan tahay intuu haystay. Hadalkoo gaaban sidoo kale waad samayn kartaa.
Miyaad ka habsaantay waqtigii guul ka gaadhi lahayd nolosha (sheeko)
Ma u malaynaysaa inaad ka dib dhacday xiligaad inaad guul gaadho?
Ma umalaynaysaa inaanad dhaafi karin waayaha iyo caqabadaha badan ee aad
waajahayso nolosha?
Ma umalaynaysaa in waqtigan aad joogto aanay gabi ahaanba suurto gal ahayn
inaad guul gaadhaa?
Haddii Haa kaga jawaabtay su'aal kamid ah su'aalahaa waa akhridaa
sheekadan, sababtoo waxay kuu saamixi doontaa inaad ogaato waxyaabo
badan oo aanad ka ogayn nolosha. Susan Boyle waa gabadh waxay dhalatay
iyadoo iyadoo maskaxda uu dhaawac sahlani kagaadhay iyadoo dhaawacaa uu
ugu wacnaa khalad uu sameeyay dhakhtarku markii ay dhalanaysay.
Sanadihii ugu horeeyay ee nolosheeda waxay jeclaatay musiga, waxaanay
jeclayd inay noqoto qof musikiiste ah, balse iyadoon ahayn qof soo jiidasho leh
waxaa niyad jabiyay dad badan oo ku agnoolaa.
Qoyskeedu waxaa haysatay dhibaato dhaqaale la'aan ah, tana waxay culay kale
ku sii dartay culayskii horee haystay. Sanadkii 1995 waxay codsatay inay ka
qayb qaadato bandhig lagu so bandhigo dadka kartida iyo hibooyinka leh balse
codsigeedii waa la diiday.
Susan waxay sii waday inay wali aaminsanaato riyadeedii ahayd inay noqoto
heesaa caan ah, balse laba sano kadib aabaheed ayaa dhintay, sanado kadibna
walaasheed ayaa sidoo kale dhimatay. Inkastoo ay nolosheedu ay la kulmaysay waxaas oo dhibaato ah, wali waxay sii wadatay aaminsanaanta riyadeedii kamanay quusan.
Sii wadistii riyada
Sanadkii 2007 hooyadii dhashay Susan, qofkii kali ahaa ee adduunka dhan ka
siinayay taageeraday u baahantahay ayaa sidoo kale dhimatay, waxaanay kali
ku noqotay adduunka. Arintani markii ay dhacday Susan waxay ka niyad jabtay
oo ay joojisay riyadeedii ahayd heesaha waxaanay dib ugu noqotay aqalkeedii yaraa.
Sanado badan oo silica kadib, Susan waxay go'aansatay inay marlabaad dib ugu
dagaalanto riyadeedii waxaanay ku biirtay bandhig la odhan jiray Britain's got
talent show, oo lagu soo bandhigi jiray dadka hibooyinkooda iyo
hawlkarnimadooda, waqtigaana ahaa halka meesha laga soo saaro hobolada
(heesaayada) ingiriiska.
Iyadoo aaminsan in aanay ku guulaysanayn iyadooy ugu wacan tahay
muuqaalkeeda iyadoo da'deedu Afartan jir kor u dhaaftay, haba yaraatee wax
rajo ah kamay qabin inay noqon doonto heesaa caan ah, balse hadana way sii
waday halgankeedii iyo dagaalkii ay ugu jirtay riyadaa.
Kadib 30 (soddon sano) oo ay u soo halgamaysay riyadeeda, waxay ugu
dambayntii soo istaagtay masraxii bandhiga, waxaana ugu horeyn la waydiiyay
intay da'deedu jirto waxaanay ku jawaabtay "waxaan ahay 47 jir" qofkastaaba
afkuu gacanta ku qabsaday, garsoorihii bandhiga ayaa xataa madaxa
qabsadayoo la yaabanaa, dhamaan dadkii meesha joogayna way ku qoslayeen
kana maadsanayeen.
Balse markii ay ku bilawday, ee ay ku dhufatay heestii ayuu jawigu gabi
ahaanba iska badalay sidii uu ahaa. Qofkastaaba wuu yaabay, yaab kaduwan kii
hore, wuxuu la dhacay oo qofkastaaba codkeedii. Dhamaan wixii masraxa
joogayna way u wada istaageen sacabka ayaana kala joogsan waayay.
Dhawr cisho kadib bandhigeedii muuqaalkii laga duubay wuxuu noqday mid
kamid ah kuwa loogu daawashada badan yahay youtube-ka, Susan waxay
habeeno gudahood ku noqotay qof caan ah, albamkeedii ugu horeeyay oo la
oo la odhan jiray " I dreamed a dream" oo Somali noqonaya"waxaan riyooday
riyo" wuxuu noqday ka loogu iibsashada badan yahay UK waxaanu kaalmaha
sare ka galay sidoo kale wadanka maraykanka.
Waxay ka samaysay iibinta albamkeedii ugu horeeyay 5 milyan oo lacagta
ingiriiska ah, waxaanay markii dambe sii daysay albamkeedii labaad iyo
saddexaad oo iyaguna sidoo kale aad u guulaystay. Sanadkii 2012 dhaqaalaha
iyo hantida Susan waxaa lagu qiyaasay in ku dhaw 22 milyan oo Sterling.
Casharada Aadka u Qaaliga ah ee aan ka baranay sheekadan
1. curyaanimada dhabta ah: qofka dhab ahaan u curyaanka ahi waa qofka
haysta caafimaad fiican, muuqaal ahaan aan lahayn curyaanimo
kamuuqata hadana aan u dagaalamin hadafyadiisa sababtoo ah wuxuu
aaminsan yahay in aanu guul gaadhi karin. Susan oo aynu nidhi
maskaxday dhaawac yar ka qabtay runtii may ahayn qof curyaan ah,
balse qofkasta oo ka rajo dhiga inuu dagaalamo hadafyadiisa ayaa curyaan dhaba ah
2. Xushmada waala kasbadaa: markii Susan ay soo istaagtay masraxa ninkii
garsooraha ahaa si xun ayuu ula yaabanaa uguna jeesjeesayay markii uu
waydiinayay su'aalaha, dhamaan daawadayaahsii meesha joogayna way
ku qoslayeen! Balse markii dambe ee ay soo bandhigtay Susan codkeeda
dhamaan wixii meesha joogay way u kaceen! Xushmada waa la
kasbadaa.
3. Badanaa waxaa jirta rajo: Susan waxay ahayd qof maskax ahaan u
dhaawacan oo maskaxda curyaan ka ah, waa loo awood sheegtay,
meelkastana waa ladiiday, kaaga siidarane waxay mid mid u wayday
dhamaan xubnihii qoyskeeda, hadana waxay ku maaraysay inay sii wado
socdaalkeeda ugu dambayna way ku guulaysatay. Badanaa waxaa jirta
rajo waxaan suurtogal ahayna ma jiraan.
4. Wali Cimri kaamuu tagin: Susan waxay bilawday inay heesto iyadoo 12
jir ah balse waxaa si fiican loo aqoonsaday markii ay noqotay 47 jir. Wali
cimri kaamuu tagin waxaanad awood u leedahay inad riyooyinkaaga sii
wadato. Waxaad badanaa bilaabi kartaa waqti kasta waxaanad heli
kartaa waxa aad rabto balse waa inaad wadaa socdaalkaaga oo aanad quusan.
5. Waligaa ha joojin iskudayga: kawaran haddi aanay gabadhasi ka qayb
kali lahayn bandhigaa? Kawaran haddii aan la arki lahaynba oo ay aamini
lahayd in la diidi doono. Haddii ay ka rajo dhigi lahayd riyadeeda iyo
hamigeeda maanta maynu maqalneen. Waxkastoo dhacaba waligaa ha quusan.
Haw ogolaan qofna inuu riyadaada u badalo wax laga xishoodo. U dagaalan
waxa aad rabto riyadaadana ka dhig mid rumawda.
Sheekadii Guusha Ee Ibrahim Elfiqi
Sheekada Ibrahim Alfiki waa sheeko guul ah oo u qalanta in la sheego. I brahim
Alfiki waa nin u huray noloshiisa intii ugu badnay inuu dadka kale baro sida
looga gudbo caqabadaha ka hor yimaada intay ku jiraan socdaalka ay guusha
ku rabaan. Ibrahim alfiki wuxuu noloshiisa intii ugu badnayd ku bixiyay sidii uu
u faafin lahaa fikir iyo akhlaaq togan.
Wuxuu u arkay sheekada noloshiisa inay tahay tusaalaha ugu fiican ee qof
gaadhay caanimo balaadhan iyo lacag isagoo kaliya aaminsanaa riyooyinkiisa
ilaa ay dhab ka noqotay.
Noloshii Hore Ee Ibrahim Alfiki iyo Sida Uu Heerka KU Gaadhay
Ibraahim Alfiqi noloshiisii hore waxay ahayd mid ka duwan nolosha dadka kale.
Wuxuu ku dhashay dalka Masar sanadku markuu ahaa 1950. Wuxuu degree
jaamacada ee ugu horeeyay ku qaatay kuliyada dalxiiska iyo Huteelada. Kadib
qalin jabintiisii waxay sanadku markuu ahaa 1978 isaga iyo xaaskiisii u
socdaaleen dalka Canada si ay u helaan nolol fiican. Markii uu yimiday dadkii
uu la kulmay ee Canada joogay waxay u sheegeen inuu dalkiisii iskaga noqdo
maadaama aanay waqtigaa wadankaa ka jirtay camal la'aani. Ibrahim Alfiki
lacagtii uu markaa haystay waxay ahayd $1000 oo kaliya dareenkaa xooganina
muu niyad jabin balse Ibrahim wuxuu bilaabay inuu shaqo raadsado.
Wuxuu galay waraysi shaqo mid kamid ah huteelada dalka waxaanu u sheegay
maamulihii hoteelku "Kuma haboonid shaqada huteealada" Ibrahim wuxuu ka
tagay halkii isagoo niyad jabsan balse wuxuu go'aansaday in aanu quusan.
Laba maalmood gudahoodna wuxuu helay laba shaqo. Labada shaqo tii ugu
fiicnaydna waxay ahayd inuu xalo ama dhaqo saabaanka ama weelka cuntada
laga cuno mid ka mid ah hoteelada dalkaasi. Inkastoo shaqadaasi aanay ahayn
ta ugu fiican hadana wuu aqbalay shaqadii isagoo ku adkaystay inuu
socdaalkan kasoo bilaabo meel aad u hooseysa ilaa uu ka gaadhayo meel sare.
Ibrahim wuxuu si dag-dag ah horumar uga sameeyay shaqadiisii marba marka
ka dambaysana wuu sii dalacayay ilaa uu markii dambe noqdayba maamulihii
huteelka, intaa kadibna wuxuu ku guulaystay abaalmarin ah maamulaha ugu fiican huteelada ee waqooyiga America, intaa kadib hadana wuxuu noqday mid
kamid ah dhiirigaliyaayasha ugu weyn ee dalka Canada, dhamaan Carabta iyo
Wadamo kaloo badan.
Ibrahim wuxuu ku casho casuumay ninkii huteelka lahaa ee markii ugu
horeysay diiday intii ay ku jireen wada hadalkoodana wuxuu u sheegay inuu
yahay wiilkii yaraa ee barigii diiday
Maxaynu Ka Barran Karnaa Sheekadan:
● Guulaha Gaadhaa Wax Muhiimad ah ma siiyaan diidmada:
Ibrahim Alfiqi wuxuu takhasus-kiisu ahaa Hoteelada aqoon badana wuu
u lahaa, balse markii ugu horeysay waxaa loo sheegay inaanu ku
haboonayn ka shaqaynta huteelada, balse wuxuu ahaa qof aaminsan
naftiisa dhagna umuu dhigin diidmadii lagala horyimiday ilaa uu markii
dambe u cadeeyay qofkii diidanaa qaladkiisa. Hadii aad rabto inaad
nolosha guul ka gaadho waa inaad ilawdaa diidmooyinka sababtoo
badankoodu wax micno ah ma sameeyaa.
● Aamin Naftaada: Sideebuu qof uu sii wadan karaa socdaalkiisa isagoo la
kulmaya diidmooyin badan hadana aan rajo dhigayn? Dhamaan dadka
guulaha gaadhay waxay si adag u aaminsanaayeen naftooda taasina waa
sababta diidmooyinku aanay u gilgilin kalsoonida ay ka qabaan naftooda.