Qaybtii 3aad
Sheekadii guusha ee Coca-cola
Uma malaynayo inuu jiro qof aduunka ku nool oon wali maqal sharaab coca
cola la yidhaa. Cocola waa shirkad sharaabka soo saarta oo lagu qiyaasay
hantideeda in ka badan 160 bilyan oo dollar, sanadkastana waxay iibisaa in ka
badan 40 bilyan oo dollar, caalamkoo dhana waa laga helaa.
Dad badan ayaan fahansanayn siday guushu u dhacdo, waxayna ka haystaan
fikrado qaldan, fikradahaa way aaminaan, waxaanay ka dhigtaan wax xaqiiq ah oo jira.
Qofka iska caadiga ahi wuxuu umalayn doonaa in shirkadan Coca cola uu
bilaabay qof milyaneer ahi, si fudud uu ugu balaadhiyay aduunkoo dhan, balse
xaqiiq ahaan ninkii bilaabay shirkadan sharaabka oo la odhan jiray John
Pemberton wuxuu ahaa nin farmasii iibiya ( meesha dawooyinka lagu iibiyo ).
Wuxuu si qalad ah oo aanu ugu talo galin u soo saaray oo uu u ogaaday isku
jirka sharaabka, waxaanu isku dayay inuu ka iibiyo wixii uu soo saaray farmasi
kale oo agtiisa ahaa 5 centi ayaanu ka siiyay koobkiiba.
Sanadkii horeeyay Coca cola wuxuu iibiyay 9 caagadood oo sharaaba
maalintiiba. Sanadka dhamaadkiisiina wuxuu wuxuu shaqeeyay lacag
gaadhaysa 50 dollar, 73 dollar-na wuxuu ku bixiyay xayaysiinta sharaabkaa.
Waxaanad arki kartaa inuu khasaaray sanadkaa.
Sanado kadib niman ganacsato ah ayaa kaga iibsaday ninkii aasaasay lacag
gaadhaysa $2300, sanado kadibna waxay noqotay shirkadaa weyn ee aynu
maanta naqaano.
Ma ogaatay sida hooseeysa ee u ku bilaabmay ganacsigan?
Sidoo kale ma ogaatay sida uu u noqday ganacsi weyn?
Casharada laga baran karo sheekadan
Waxaa jira casharo aad u muhiim ah oo aynu ka baran karno sheekadan.
1. Waxaad ka bilaabi kartaa meel aad u hooseeysa waxaanad gaadhi
kartaa meel aad u saraysa : shirkadaa dhan waxaa laga bilaabay meel
farmasii ah, sanadkii ugu horeeyayna wax faa'ido ah may samayn. Dad
badan ayaa u maleeya in inaad wax bilawdaa ay u baahantahay wax
weyn si aad meel weyn u gaadho, taasina waa fikir qaldan oo ay ka
aaminsan yihiin guusha.
2. Waa wax iska caadi ah in aanad wax natiijo ah arag bilawga hore : aan
ku waydiiyo su'aal. Maxaad samayn lahayd haddii sharaab cusub oo aad soo saartay laga iibsado 9 cabitaan oo kaliya sanad dhan? Miyaad niyad
jabi lahayd ood joojin lahayd? Dad badan ayaa u maleeya in ay tahay
inay marka hore natiijo helaan si ay u sii wadaan, balse xaqiiqdu waxay
tahay natiijada aad rabtaa waxay imanaysaa markaad sii wado.
3. Waxaad heshaa waxaad u qalanto markaad sii wado dadaalkaaga: coca
cola waa sharaab cajiib ah, waxaanu u qalmaa inuu caan noqdo balse
haddii ninkii aasaasay uu niyad jabi oo uu joojin lahaa markuu iibiyay 9
cabitaan sanad dhan heerkan muu soo gaadheen. Haddii aan si kale u
dhigno haddii fikirkaagu yahay fikir aad u fiican haka rajayn inay dadku
hore ka taageeri doonaan ilaa aad samayso dadaal aad u badan mooyaane.
Bal adiga kawaran?
Bal hadaba adigu isku noqo?
Maxa kaa hortaagan ee dib kaaga haya inaad gaadho hadafyadaada?
Ma dadkaa diiday fikradahaaga? Dad badan oo maanta guul ka gaadhay
nolosha raadna ku reebay aduunka ayaa la diiday fikradahooga, balse waxa u
suurto galiyay inay sida cadceeda uga soo muuqdaan adduunka intiisa kale waa
quusasho la'aanta iyo sii wadista. Lacag kugu filan mahaysatid miyaa? Coca
Cola-ha aad arkayso fikradiisu waxay aad uga liidatay fikirka aad maanta hayso.
Dad badan ayaa waxaa curyaamiya fikirkadaha beenta ah ee ay guusha ka
haystaan, xagii ay xaqiiqda ka arki lahaayeen. Haddii ay xaqiiqda arki lahaayeen
waxay qiri lahaayeen inay u halgamaan fikradahooga ayna waajahaan
caqabadaha ay la kulmi lahaayeen.
Waxa aad kuugu fudud inaad tidhaahdo " ma haysto lacag igu filan oo aan ku
bilaabo ganacsi" " nasiibkaygu ma fiicna" xagii uu ka qiri lahayd inaad masuul
buuxa ka tahay natiijooyinka aad helayso noloshaada.
Ma garanaysaa sababta ay dad badani fikir been ah uga haystan guusha?
Sababtoo ah dadkaasi mala dhiiranaan ay ku qirtaan inay badali karaan noloshoda.
Sheekadii Guusha Ee Nic Vujicic
Dadku badanaa markay la kulmaan duruufo adag laba dookh mid uunbay
sameeyaan inay isdhiiban oo ay rajo dhigaan ama inay waajahaan oo ay la
dagaalamaan duruufahaa adag. Badanaana dookhani waa waxa go'aamiya sida
ay noqonayso nolosha qofkaasi.
Inaad si xoogan u aaminsanaato riyooyinkaagu waa waxa kugu taageeri kara
halgankaaga aad kaga soo horjeedo rajo la'aanta. Yeelashada damac xoogan
iyo go'aan aad guul ku gaadhaa waa waxa kaliya ee kuu rumayn kara hadaf aad
leedahay isla markaana ku siin kara rajo xoogan oo aad kaga gudbi karto
dhamaan caqabadaha aad waajahayso.
Farxada iyo badhaadhuhu waxa suurtogal ah inay umuuqdaan waxay adag
tahay in la helo, balse waxaan shaki ku jirin inay sugayaan inay kugu abaal
mariyaan dhamaadka wado ay ka sokeeyaan shaqo adag iyo halgan badani waa
haddii aad go'aansato inaad raacdo wadadaa.
Qofka bili'aadanka ahi wuxuu guuldaraystaa oo kaliya markuu aamino in aanu
gaadhi karin riyooyinkiisa.
Inaad fuusho salaan dheeri dhab ahaan wax khatarteeda leh, balse waa inaad
fuushaa haddii aad rabto inaad gaadho ujeedkaaga, sababtoo ah hadii aanad
fuulin fursada kaleed haysataa waa inaad hoostaagnaato uun salaanka oo aad
ka cabato uun siday noloshu u adagtahay.
Sida Loo Helo Waxaad Rabto Nolosha Adoon u Eegayn Waxaa aad haysato.
Nick Vujicic waxa uu 1982 ku dhashay melbourne oo tirsan dalka australia,
waxaanu dhashay xanuun bili'aadanka mar mar iyo dhif lagu arko, kaasi oo ah
inuu dhashay isagooy ka maqan yihiin afartiisii adin( labadii lugood iyo labadii
gacmoodba). Markii ugu horeysay ee uu dhashay hooyadii waxay diiday inay
aragto amase ay qabato iyadoo kalkaalisadii ay u haysay mudo, markii dambe
waxay ku qanceen Markii uu yaraa curyaanimada Vujicic waxay ku sababtay inuu waajaho halgan muuqaaleed iyo mid dareen ahba.
Sharciyada dalkiisa u yaala umay suurtogalin inuu ku biiro iskuul fiican, waxyar
kadib markii loo ogolaaday inuu ku biiro iskuulkiina wuxuu cadaadis iyo xoog
sheegasho kala kulmay ardaydii ay dugsiga wada baranayeen taasi oo ku
sababtay inay murugo aad ubadani haleesho markii uu 8 jir ahaa. Markii uu 10
jir noqday wuxuu iskudayay inuu isdilo markii uu u adkaysan waayay noloshuu
ku sugan yahay.
Vujicic hamigiisu wuxuu ahaa inuu ku noolaado nolol guul leh, islamarkaana uu
yeesho awood uu kaga gudbo dhamaan ayaandarooyinkan haleelay si uu guul
u gaadho.
Inkastoo aanu lahayn wax adimo ah, hadana kamuu fikiri jirin waxaanu haysan,
balse si sidaa kasoo horjeeda mid kamid cagihiisa aad ka u dhumucda yar oo
lahayd laba farood ayaa ku hogaamisay nolol barwaaqo ah. Wuxuu bartay sida
loo isticmaalo computer-ka waxaanu halkii minute ba qori karaa 40 xaraf.
Sidoo kale wuxuu awood u yeeshay inuu tuuro kubada tenniska, inuu qabsado
galaas biyo ah,inuu shanleeyo timihiisa,inuu cadayo ilkihiisa, inuu taleefanka u jawaabo, islamarkaana uu gadhka xiirto. Wuxuu ciyaari kartaa noocyo badan
oo kamid ah sportiga sida golf-ta, dabaasha,iyo waxa loo yaqaano skydiving.
Waxa uu laba bachelor degree ah ka diyaariyay xisaabaadka iyo dhaqaalaha.
Vujicic wuxuu ku guulaystay inuu noqdo qof dadka dhiirigaliya, waxaanu u
socdaalay dhamaan aduunkoo dhan, isagoo lahadlay 3 milyan oo qof oo ku
kala nool in kabadan 44 wadan. Isagoo barayay dadka sida loo rumeeyo
riyooyinkooga. Waxaana ka mid ah hadaladiisa ugu caansan markuu dadka
dhiirigalinayo “Dream big my friend and never give up. We all make mistakes but none of
us are mistakes.”
Markii dambe wuxuu aasaasay urur loo yidhaa " life without limbs" iyo shirkad
la yidhaa " attitude is altitude". sanadkii 2005 waxaa loo magacaabay
abaalmarintii sanadka ee dhalinta australia. 2002 wuxuu guursaday Kanae
Miyahara waxaanu dhalay laba caruur ah.
Sheekadan Nic Vidicic waxay indhaheena u furaysaa xaqiiqda ah in
daciifnimadu ay ku dhacdo qalbiga balse aanay ahayn jidhkaagoo si fiican u
shaqayn waaya. Dhiirigalin la'aantuna tahay xanuun ku dhaca maskaxda balse
aanay ahayn jidhka. Isagoo arintan ka hadlayana wuxuu yidhi " curyaanimo ta
ugu weyni waa cabsida waxaanay kuu qalalin doontaa si kadaran kursiga
curyaanka. Hadaba waa maxay cudurdaarkaagu.
Sheekadii Guusha Ee Subhreet Kaur
Miyay Waxyaabo Aad Xadaysatay Dib Kaaga Hayaan inaad ku
guulaysato hadafkaaga ?
Goormay markii kuugu dambaysay eed aamintay in aanad waxba qaban karin?
Goormay ahayd markii kuugu dambaysay eed aamintay inay jiraan waxyaabo
aanad dhaafi karin oo kaa hortaagan inaad gaadho hadafyadaada?
Goormay markii kuugu dambaysay eed aamintay inaanad lahayn hanti aad ku
gaadhi karto hadafyadaada.
Subhreet Kaur waa gabadh u dhalatay dalka India oo lug kaliya leh, lugteedii
kalana ku wayday shil baabuur oo ay gashay. Subhreet waxay go'aansatay inay
noqoto qof ciyaara jaaska iyadoo lug kaliya leh, waxaanay bilawday in si joogto
ah u tababarato. Waxay ku sii xoogaystay jacaylkii ay u qabtay inay noqoto
jaasaa caan ah waxaanay cadaysay in aanay jirin waxaan suurto gal ahayni.
Subhreet waxay ka qayb gashay tartanka la yidhaa " India's Got Talent"
waxaana loo doortay inay ka mid noqoto dadka ka qayb qaadanaya.
Markii ay bilawday jaaskeedii waxay u jaastay si aanay dadka caadiga ahi aanay
u jaasin, waxaana sacab ula kacay, fadhigana uga kacay garsoorayaashii
tartanka waday. Agteerka Salman Khan Oo kamid aha garsoorayaashii meesha
joogay ayaa yaab awgii ku dhawaaday inuu khalkhalo isna xejin kari waayay.
Waxaanay ku guulaysatay tartankii iyadoo ka guulaysatay dad badan oo laxaadkoodu dhamaystirna waxaanay noqotay qof caan ah.
Hadaba imika waxaa jira su'aalo ay aad u muhiim tahay inaad waydiiso naftaada.
Hadii aad taagnaan lahayd booska inantaa, oo aad u sheegto saaxiibadaa inaad
doonayso inaad barato sida loo jaaso, maxay noqon lahayd jawaab celinta
saaxiibadaa.
Miyuu qofna kuu sheegi lahaa inay suurto gal noqon karto?
Iska ilawba saaxiibadaa, sideebay maskaxdaadu kuugu jawaabi lahayd haddii
aad naftaada u sheegi lahayd inaad baranayso sida loo jaaso.
Miyay maskaxdaadu kuu sheegi lahayd inay suurtogal tahay inaad la tartanto
dad laxaadkoodu u dhamaystiran yahay adoo lug kaliya leh ? mise
maskaxdaadu waxay kuu soo diri lahayd fikiro taban oo ay kuugu sheegayso
inaanay suurto gal ahayn.
Dadka curyaamiinta ahi maaha dadka ay ka maqan yihiin qayb ka mid ah
laxaadkoodu balse waa kuwa ka aaminay nolosha fikiro been ah oo si toos ah u
curyaamiyay inkastoo ay leeyihiin jidh caafimaad qaba.
Curyaanimada Dhabta ah
Waxyaabaha xadida awooda qofka ee ka joojiya inuu hadafkiisa gaadhaa
ma'aha qofka oon haysan hanti ama wax kale oo u suurtogaliya inuu gaadho
hadafkiisa balse waa fikir qaldan ee uu qofku aamino. Haddii aad tahay qofka
ugu awooda badan aduunka balse aad aaminsantahay inaad daciif tahay
waligaa ku guulaysan maysid in meel gaadho.
Dhinaca kale haddii aad qof curyaan ah tahay, balse aad leedahay fikir
caafimad qaba, waxaa samayn doontaa guulo aan inaba caadi ahayn, kuwaas
oo dadka muuqaal ahaan u caafimaad qabaa aanay gaadhi karin.
Guushu gabi ahaanba waxay ku xidhan tahay waxyaabaha aad aaminsan tahay
ee ka dhex guuxaya maskaxdaada.